Зошто срцето забрзано чука по физички напор?

Забрзан рад на срцето, односно тахикардија, значи зголемување на срцевата фреквенција над 100 отчукувања во минута. При физички напор е нормално бројот на отчукувања да се зголеми над горната граница. Доколку забрзаниот рад на срцето се одржува и во состојба на мирување, тоа е знак да се обратите кај лекар. Најсоодветно е да се направи целосен кардиолошки преглед со ЕКГ и ултразвук на срцето, а по потреба и 24-часовно снимање со Холтер монитор. Исто така, треба да се провери и функцијата на штитната жлезда (ТСХ, ФТ4, ФТ3), бидејќи нејзините нарушувања можат да предизвикаат вакви тахикардии. Прекумерното консумирање кафе, енергетски пијалаци и кока-кола исто така може да биде причина за тегобите. Препорачливо е при почетокот на тренинг постепено да се зголемува интензитетот на оптоварувањето. Дополнително, корисно е да се направат целосни лабораториски анализи, крвна слика и серумско железо, како и кардиолошки преглед со ултразвук на срцето, за да се утврди причината за симптомите и да се одреди понатамошен третман.