Зошто се зголемени триглицеридите и што да се направи?

Вредноста на триглицеридите може да се зголеми независно од холестеролот, како последица на неадекватна исхрана богата со масти. Најчесто причина за повишени вредности е лоша исхрана, физичка неактивност и обезитет, а понекогаш можат да бидат поврзани и со други метаболички болести (кои обично се придружени со симптоми). Лекувањето првенствено подразбира корекција на исхраната (диета) и воведување физичка активност, со редукција на телесната тежина, особено на масното ткиво во регионот на стомакот. Обемот на стомакот кај мажите треба да биде до 94 см. Што се однесува до исхраната: препорачливо е да се консумира пилешко и мисирка месо, а да се избегнува свинско, црвено месо и месо од дивеч. Добро е да се земаат обезмастено млеко, јогурт, кисело млеко, кефир, црн леб, ржан леб, леб од цело зрно, проја, ориз, сите видови варено зеленчук, салати, соја и производи од соја, јаболка, круши, портокали, лимон, мандарини, дунки, јагоди, малини, купини, боровинки, чај и кафе без шеќер, минерална вода и природни сокови без шеќер. Ако со диетален режим не се постигнат посакуваните вредности, се препорачуваат лекови (од групата на фибрати, ниацин, омега масни киселини). Следниот пат кога ќе правите анализи, имајте на ум дека триглицеридите во крвта се појавуваат многу брзо по внесувањето на мрсна храна (веќе по два часа), а се задржуваат и до 12 часа, поради што е неопходно анализата да се прави на празен стомак, по дванаесетчасовно гладување. Советот е да се воведе правилна исхрана, физичка активност доколку е можно, и редукција на телесната тежина доколку е проблем. Доколку овој режим не биде доволен, може да се започне со лекови кои целно делуваат на повишените триглицериди во крвта.