Што претставуваат израстоците на завршниот дел на дебелото црево?

Врз основа на опишаните тегоби, се работи за хемороиди. Хемороидите или шуљевите се проширени вени кои се наоѓаат под слузницата на завршниот дел на дебелото црево и чмарот. Тие се отечени крвни садови кои се прошируваат под притисок и изгледаат како испакнатини, односно чворчиња, чија големина зависи од стадиумот на болеста. Врската помеѓу артериите и вените во завршниот дел на дебелото црево е директна, преку таканаречени шантови, преку кои крвта од артериите на хемороидите преминува во вените. Кога оваа врска е постојано отворена (што е случај кај болеста хемороиди), доаѓа до зголемен проток на крв, што предизвикува проширување на хемороидалните вени и зголемување на самите хемороидални чворови. Надворешните хемороиди се помалку значајни од внатрешните, но почесто предизвикуваат тегоби. Најчести причини за нивна појава се бременоста, затвор, долго седење при празнење, како и несоодветна исхрана (сува храна, зачинета храна, помал внес на житарки). Се препорачува преглед кај гастроентеролог или колоректален хирург - проктолог, со цел преку ректален преглед да се утврди дали постојат и внатрешни хемороиди. Постои терапија за хемороиди, при што пред сè се препорачува исфрлање на зачинета храна, а потоа употреба на масти и гелови, како и супозиториуми (чепчиња) кои влијаат на намалување на хемороидите.