Како да се намалат зголемените триглицериди во крвта?

Зголемените вредности на триглицеридите пред сè можат да се коригираат со правилна исхрана: од млеко и млечни производи дозволени се обрано млеко, кисело млеко, кефир, јогурт и свеж кравји сир; од риби варена бела морска риба, варена сина риба (сардина, скуша, лосос), потоа пилешко и мисирско месо без кожа, а во многу помала мера говедско, телешко и јагнешко месо доколку е отстранета сета видлива маст. Од зеленчук се препорачуваат сите видови подготвени без маст, како зелена салата, зелка, спанаќ, блитва, домати, краставици, пиперки, карфиол, бел и црн лук, соја и производи од соја, а во помала мера компир, ориз, тестенини и леќа. Од овошје се препорачуваат јаболка, вишни, грејпфрут, лимон, дуњи и јагоди. Дозволени се овошни сокови без шеќер, како и црно кафе со вештачки засладувачи или без шеќер. Најдобро е да се избегнува леб и пецива, но дозволени се тестенини од секаков вид и црн леб. Слатките се забранети. Дозволени се сол, сенф и други зачини, а од маслата се препорачува маслиново масло. Доколку промената на исхраната не даде резултат, постојат лекови од групата на фибрати кои влијаат врз намалување на нивото на триглицеридите во крвта.