Каква болест може да предизвика одгледувањето гулаби?

Потребно е да се направи крвна слика за да се видат вредностите на леукоцитите и леукоцитарната формула (неутрофили и лимфоцити). Треба да се направи седиментација на еритроцити, а од биохемиските анализи - CRP, уреа, креатинин, AST, ALT, директен и вкупен билирубин, јонограм (Na, K, Cl), GGT, LDH и фибриноген. По тоа се препорачува рендген на бели дробови. Дијагнозата астма се поставува врз основа на спирометрија. Рендгенот на белите дробови во најголем број случаи покажува пневмонија која настанува како последица на орнитоза (пситакоза). Параметрите на воспаление кои се особено важни во тие случаи се токму седиментацијата, фибриногенот и CRP. Во периферната крвна слика обично се среќава умерена леукоцитоза со лимфоцитоза, а седиментацијата на еритроцитите е умерено забрзана или нормална. Нивото на серумските трансаминази, билирубин и алкална фосфатаза може да биде лесно до умерено покачено. Рендгенскиот наод на градниот кош открива промени на белите дробови во смисла на централна пневмонија, која подоцна се шири и зафаќа и други здрави делови на белодробниот паренхим. Рендгенската слика кај пациенти со пситакоза не може да се разликува од рендгенската слика на вирусна пневмонија. По поставување дијагноза на пневмонија, треба да се разгледа и можноста за инфекција со микоплазма пневмонија, Ку-треска, бактериска пневмонија, туларемија, легионарска болест и слично. Може да се земе и примерок од спутум за анализа, бидејќи преку него може да се изолира причинителот. Треба да се напомене дека овие специфични анализи за орнитоза стандардно не се работат во поголемите болнички центри, туку главно во специјализирани институти.