Што значи наод на дискретна лента на IgG, тип Kappa?

Молекулите на IgG се составени од два лесни ланци (капа или ламбда) и два тешки ланци. Околу 80% од серумските имуноглобулини се IgG, а нивната главна улога е одбрана од микроорганизми, директна неутрализација на токсини и индукција на фиксација на комплементот. IgG е единствениот имуноглобулин кој може да ја помине плацентарната бариера и да обезбеди пасивна имуна заштита за фетусот и новороденчето. Оваа заштита трае додека, околу 6-месечна возраст на детето, не почне да делува сопствениот имунолошки систем, а вредностите на возрасен се достигнуваат околу 18-месечна возраст. Зголемување на поликлонскиот IgG може да се јави кај системски лупус еритематозус, хронични заболувања на црниот дроб (инфективен хепатитис и Лаенекова цироза), инфективни заболувања и цистична фиброза. Моноклонскиот IgG се зголемува кај IgG-миелом. Намалена синтеза на IgG се среќава кај вродена и стекната имунодефициенција и селективен дефицит на IgG подкласа, како што е Брутоновиот тип на агамаглобулинемија. Намалени концентрации на IgG се забележуваат и кај ентеропатии со губење протеини, нефротски синдром и преку кожата поради изгореници. Зголемен метаболизам на IgG се среќава кај Wiskott-Aldrich синдром, миотонична дистрофија и кај присуство на анти-имуноглобулински антитела. Определувањето на IgG во цереброспиналната течност (ЦСТ) се користи за проценка на инфекции кои го зафаќаат централниот нервен систем, неоплазми или примарни невролошки заболувања (особено мултипла склероза). Зголемените концентрации на IgG во ЦСТ можат да настанат поради зголемена пропустливост на крвно-мозочната бариера, поради локална/интратекална продукција на IgG, или поради комбинација на двете. Се препорачува понатамошно испитување на причината за зголемениот капа IgG, во договор со надлежниот лекар и во зависност од симптомите, односно клиничката слика.