Што може да значи чувство на поскокнување и треперење во пределот на стомакот?

Според опишаното, можно е да станува збор за хијатус хернија (лизгачка хернија). Таа настанува кога желудникот пролабира од стомакот во градниот кош низ отвор на дијафрагмата. Како последица на тоа се јавуваат бројни симптоми, најчесто предизвикани од задржување и неконтролирано враќање на желудочната содржина во хранопроводот. Хијатус хернијата всушност е анатомски дефект што ја нарушува нормалната функција на завршниот дел на хранопроводот и почетниот дел на желудникот, чија улога е нормален транспорт на храната и спречување на враќање на желудочната содржина. Кога постои таква хернија, киселината слободно се враќа во хранопроводот и предизвикува симптоми. Желудочната хернија најчесто не предизвикува симптоми. Кога се јавуваат, тие вклучуваат: горушица, зачестено подригнување, гадење, повраќање и регургитација (неконтролирано враќање на желудочната содржина во хранопроводот и грлото). Овие симптоми можат да бидат присутни кај сите типови на желудочни хернии. Доколку хернијата е поголема, можат да се јават и позагрижувачки симптоми како: повремено отежнато голтање, особено на цврста храна, чувство на ситост по неколку залаци, болка во стомакот или средогрудието, како и крварење од горниот дел на дигестивниот тракт, кое се манифестира со повраќање на свежа црвена крв или со црна, катранеста столица, често придружено со анемија. Бидејќи се јавува и чувство на чукање во пределот на стомакот, треба да се обрне внимание и на абдоминалната аорта. Во секој случај, препорачливо е да се направи комплетен ултразвук на абдоменот, за да се утврди дали станува збор за метеоризам што го подигнува желудникот и дијафрагмата, како и да се провери дијаметарот на абдоминалната аорта. Разговарајте со Вашиот лекар, како и со интернист, за да проценат дали е потребно да се направи контрастна радиографија на горниот дигестивен тракт (рендгенско снимање на хранопроводот и желудникот со контрастно средство) или 24-часовна pH-метрија.