Силни болки во стомакот со повраќање кои не престануваат веќе една недела - што може да биде причина?

Во вакви случаи неопходно е да се пристапи кон подетална дијагностика. Според опишаната локализација на тегобите, причина може да биде силна инфекција како хеликобактер пилори, чир на желудникот, патолошки состојби на жолчното кесе (камења), дебелото црево или панкреасот. Најчести причини за болка во горниот дел на стомакот се диспепсија, гастритис и пептична улкусна болест (чир на желудникот или на дванаесетопалачното црево). Кај чирот на дванаесетопалачното црево болката типично се јавува во средината на горниот дел на стомакот и често поминува по земање храна, млеко или лекови кои ја намалуваат киселоста. Кај чирот на желудникот болката е помалку карактеристична и обично се јавува лево од средната линија на стомакот. По земање храна болката не престанува, туку може дури и да се засили, а лековите немаат ист ефект како кај чирот на дванаесетопалачното црево. Акутната воспаленост на жолчното кесе, најчесто предизвикана од камења, се манифестира со нагла појава на болка во горниот дел на стомакот и под десниот ребрен лак. Карактеристично е што оваа болка обично се шири кон грбот, кон десната лопатка, и често е придружена со гадење и повраќање. Акутното воспаление на панкреасот се карактеризира со силна, постојана болка во горниот дел на стомакот која најчесто се шири појасно кон грбот и обично е придружена со гадење и повраќање. Во вакви случаи потребно е да се направат крвна слика (за да се исклучи апендицитис преку бројот на белите крвни зрнца и леукоцитарната формула), биохемиски анализи (АЛТ, АСТ, директен и вкупен билирубин, уреа, креатинин, ГГТ, ЛДХ, алкална фосфатаза, мокраќна киселина и ЦРП), анализа на хеликобактер антиген од столица или IgA антитела од серум или издишен тест на хеликобактер, како и анализа на столица на окултно крварење и копрокултура. Важно е да се направи целосен преглед и што поскоро да се јавите кај гастроентеролог, за да се разгледа потребата од гастроскопија, со цел да се потврди или исклучи гастритис или чир на желудникот. Понекогаш болката во горниот дел на стомакот може да биде предизвикана и од кардиолошки проблеми. Дополнително, во ретки случаи може да се размисли и за порфирија, иако таа дијагноза е помалку веројатна.