Печење и болка во анусот при голема нужда - кои анализи да се направат?

Се препорачува да се направи копрокултура и анализа на столица за окултно крварење (FOBT). Потоа секако е препорачливо да се посети гастроентеролог или колоректален хирург - проктолог кој ќе изврши ректален туше преглед. Опишаните симптоми одговараат на хемороиди, надворешни или внатрешни. Ваквата слика е типична за хемороиди (проширени вени во пределот на ректумот), кои најчесто предизвикуваат болка во ректумот и анусот. Хемороидите обично се последица на хронично напрегање при вршење на нужда кај лица со долготраен затвор, или кај жени кои родиле повеќе деца. Секое напрегање или повреда на ткивото во и околу ректумот, односно во анусот, исто така предизвикува болка: апсцес, рана од минување на многу тврда столица, лацерации кај лица кои практикуваат анален однос, внесување на туѓи тела во ректумот, чести клистирања. Затоа се препорачува да се направат наведените анализи на столица, а исто така да се обрне внимание на исхраната, бидејќи исхрана сиромашна со влакна и недоволно внесување на млечни производи, мешунки и слично може да доведе до стврднување на столицата и до слични тегоби (доколку не се работи за хемороиди). Со преглед можат да се потврдат или исклучат хемороиди (третман со масти или супозитории кои ги ублажуваат симптомите, средства за омекнување на столицата, гумени лигатури, инјекции, ласерска терапија или операција во потешки случаи), оштетувања на ректумот или инфекција, чир (лекови, топли бањи, операција, а доколку е предизвикан по полов пат, потребни се антибиотици), колитис односно воспаление на дебелото црево (сигмоидоскопија е неопходна за конечна дијагноза и соодветно лекување), дивертикулитис (проширувања во слузницата на дебелото црево кои се третираат со диета и одредени лекови, а во потешки случаи со операција), како и полипи (се отстрануваат со ендоскопија или операција).