Колку е опасен Баретов хранопровод во комбинација со езофагитис и хијатална хернија?

Баретов хранопровод претставува диспластични промени на слузницата на хранопроводот, кои најчесто настануваат поради враќање на кисела желудечна содржина во хранопроводот, што хијаталната хернија дополнително поттикнува. Баретовиот хранопровод мора да се лекува за да не дојде до прогресија на болеста во малигни промени на слузницата на хранопроводот. Лекувањето е насочено кон хигиено-диететски режим, лекови и хируршко лекување. Хигиено-диететскиот режим подразбира избегнување на сите провокативни фактори, како што се пушење, алкохол, зачинета и мрсна храна, преобилни оброци и слично. Лековите се однесуваат на примена на таканаречени инхибитори на протонската пумпа во желудникот, со цел да се намали киселоста на желудечната содржина која се враќа во хранопроводот. Хируршката интервенција може да биде ендоскопска и подразбира отстранување на променетата слузница на хранопроводот. За сето ова одлучува гастроентеролог, кој го следи пациентот на редовни контроли, во соработка со пациентот.