Како да се превенира дивертикулитис?

Поставувате многу значајно прашање, бидејќи воспалението на дивертикулите не е безопасно - постои опасност, особено кај поголеми дивертикули и воспаленија, од перфорација на дивертикулот, перитонитис и шок, состојби кои се тешки за лекување и преживување. Превенцијата на дивертикулозата и нејзините компликации подразбира здрав начин на живот со секојдневно движење, кое помага во работата на цревата, внес на доволно течности (најмалку 8 чаши вода дневно), целосно избегнување на алкохол, како и на газирани и други вештачки пијалаци. Исхраната треба да исклучи слаткиши, тесто и брза храна, а во периодот на болка треба да се исклучат и млечните производи, при што се препорачува внес само на течна храна. Вон периодот на болка, во исхраната треба да бидат застапени чорби, супи, динстано и варено зеленчук, умерено интегрални житарки, повеќе риба отколку месо, како и свежо овошје и зеленчук, добро изџвакани. Таквата исхрана и животен стил треба да спречат затвор, бидејќи затворот кај дивертикулозата е опасен затоа што погодува за настанување на дивертикулитис. Важно е и да имате свој гастроентеролог кој периодично ќе врши контролни прегледи. Покрај наведеното, важно е да се избегнуваат лекови кои ја оштетуваат цревната слузница, а тука на прво место спаѓаат нестероидните антиревматици, потоа ацетилсалициловата киселина, како и многу други лекови, поради што е важно пред употреба на лек да се провери дали има несакани дејства врз цревната слузница.