Зошто се јавуваат свраб и лушпење на кожата меѓу прстите на нозете по капење?

Претпоставувам дека станува збор за габична инфекција на кожата меѓу прстите на нозете, бидејќи промените делумно се намалени со примена на кортикостероиден препарат, а и се користи заедничка тушкабина каде условите за таков тип инфекција се речиси идеални. Терапијата се спроведува со антимикотични кремови, понекогаш е потребно да се вклучи и кортикостероид за да се намали екцематизацијата на кожата предизвикана од габичката, а понекогаш се воведуваат и таблети или капсули во терапијата, но од исто значење е и соодветната хигиена. Тоа подразбира миење на нозете двапати дневно, сушење, носење чорапи без ликра, избегнување затворена и непропустлива обувка. Примената и на медикаменти и на беспрекорни хигиенски услови понекогаш не доведува до целосно излекување. Причината за тоа е постојана изложеност на габички (на влажни, топли подлоги) или пак нарушување на инервацијата, васкуларизацијата и биохемизмот на крвта, што обезбедува поволни услови за развој на габичката.