Свраб и црвенило по телото – што може да биде причина?

Врз основа на описот на промените, најверојатно се работи за уртикарија (коприва). Потребно е што поскоро да се обратите на лекар, по можност дерматолог или алерголог, бидејќи промените бараат посериозна терапија – лекови против алергија (антихистаминици, кортикостероиди) и слично. Доколку има отекување на јазикот и потешкотии при дишење, потребен е и преглед кај ОРЛ специјалист. Причините за нагло настаната (акутна) уртикарија можат да бидат различни – честа е при употреба на одредени лекови или видови храна. Понекогаш е предизвикана од инфламација во организмот (ангина, инфекции на увото, мочните патишта, некои вируси итн.), паразити во столицата, а почеста е кај луѓе со чир или гастритис. Се препорачува исхрана без конзерванси, без вештачки пијалаци, купувани сладкиши, риба, печурки итн. Најважно е да добиете соодветна терапија; ако уртикаријата трае повеќе дена, потребно е и дополнително испитување, но тоа обично се прави откако промените се повлечат.