Што е лихен склерозус ет атрофикус и како се лекува?

Лихен склерозус ет атрофикус е ретко кожно заболување со непозната причина, кое најчесто ја зафаќа аногениталната регија, а поретко може да се јави и на други делови од телото (таканаречена екстрагенитална форма). Најчесто се манифестира како белузлави, сјајни промени слични на порцелан, кои можат да се спојуваат во поголеми плочи. Во однос на причините за оваа болест се наведуваат генетски фактори, нарушувања во метаболизмот на половите хормони, инфекции (на пример со Borrelia burgdorferi), траума, а во последно време сè повеќе се поврзува и со автоимуни заболувања. Дијагнозата се поставува врз основа на карактеристичниот клинички изглед и патохистолошки наод. Лекувањето вклучува локална примена на потентни дерматокортикостероиди, како и кремови со естроген и прогестерон.