Дали интертригото во пределот на аналниот отвор е излечиво?

Интертриго е заболување кое се јавува во превоите на кожата, во вид на црвенило, проследено со свраб. Механичкото триење на кожата, несоодветната облека и засиленото потење го влошуваат состојбата, а често се јавуваат и габички (Candida), при што на зафатените површини се создаваат белузлави наслаги. Во околината на чмарот често се среќава воспаление на кожата - перианален екцем, кој може да има повеќе причини. Некои други кожни заболувања исто така можат да се манифестираат околу чмарот. Потребно е да се направи испитување на столица за паразити, на Oxiuris vermicularis, и брис за Candida. Се препорачува и основна лабораториска анализа. Со тие наоди потребно е да ве прегледа дерматолог и да препорача соодветна терапија. Пожелни се благи бањи и сапуни со неутрално pH. Кремите кои содржат цинк и ја сушат површината на кожата можат да бидат од корист. Се препорачува памучна облека во посветли бои, која не притиска.