Каква исхрана се препорачува кај хроничен гломерулонефритис?

Кај хроничен гломерулонефритис постои опасност од развој на хронична бубрежна инсуфициенција. Задача на лекарот и нефрологот е прво да се испита бубрежната функција и да се утврди дали и во кој степен постои бубрежна слабост, а во зависност од тоа се одредува исхраната за секој пациент поединечно. Генерално, кај бубрежна слабост се ограничува внесот на протеини на помала количина, како и внесот на намирници кои содржат натриум, калиум и фосфор. Тоа практично значи дека се исфрлаат нискоквалитетни намирници со многу протеини, сол и масти од животинско потекло, како што се сувомесни производи, преработки од месо, храна со многу јајца и млеко, полномасно млеко и полномасни сирења, кајмак. Се препорачува внес на растителни извори на протеини, како и употреба на висококвалитетно месо во помала количина - пилешко, говедско или риба. Јајцата и млечните производи не се целосно исфрлаат, но нивната количина се ограничува. Се исфрлаат и намирници со висока содржина на натриум, калиум и фосфор, како газирани пијалаци, алкохол, снек производи и слични готови производи. Редовните контроли на здравјето, лекувањето на основната болест и соработката со нефролог се начин да се контролира состојбата и да се спречи понатамошен развој на бубрежна слабост.