Врие во Металург, Коциќ побарал раскин на договорот

Српскиот репрезентативен голман, Мирослав Коциќ, побарал раскин на договорот со Металург, пренесува ракометниот портал „Balkan-handball.com“.

Коциќ пред три месеци пристигна во редовите на Металург од Војводина, како поддршка за репрезентативниот колега Дарко Станиќ, но како стојат работите исто како и Станиќ и тој предвреме ќе замине од екипата.

Станиќ пред помалку од еден месец спогодбено го раскина договорот со клубот, а пред неколку денови потпиша со екипа од Бундеслигата. Раскин на договорот побарал и Коциќ, но во слична ситуација како и голманот се наоѓа целиот прв тим на Металург.

Играчите неколку месеци не примиле плата и им било ветено дека тоа ќе биде сторено по нивното враќање во клубот од репрезентативните обврски, а откако тоа не се случило тие во вторникот одбиле да го одработат тренингот.