Лазаров и Барса против Веспрем во финалето на ЛШ

Барселона и Веспрем ќе се борат за титулата во ракометната Лига на шампиони во сезоната 2014/2015. Барселона во полуфиналето славеше над Киелце со 33:28, додека Веспрем го совлада Кил со 31:27.

Финалниот двобој ќе биде и пресметка на двајцата најдобри стрелци во ЛШ, Кире Лазаров и Момир Илиќ, српскиот ракометар има три голови повеќе (109-106).

Барселона во целост ја оправда фаворитската улога против Киелце, а во победата Лазаров партиципираше со седум голови, еден помалку од Никола Карабатиќ, најдобриот стрелец на мечот.

Веспрем во второто полуфинале го совлада Кил (31:27) и се избори за своето прво финале. Илиќ со осум, односно Наѓ и Иванчик со по седум голови го предводеа унгарскиот тим, каде голем придонес даде и голманот Алиловиќ со 14 одбрани.

Палмарсон со девет голови беше најефикасен кај Кил.

Финалето ќе се одигра денеска со почеток во 18 часот.